Tidlegare i år sette styret i Noregs Mållag som mål at organisasjonen i 2020 skulle få 14.000 medlemmer. No er målet nådd.
– Det er det høgste medlemstalet i Noregs Mållag på 32 år, seier leiar i Noregs Mållag, Peder Lofnes Hauge i ei pressemelding.
For ti år sidan hadde organisasjonen til samanlikning 10.068 medlemmer. Seinare har medlemstalet auka i fleire byks.
Mållagsleiaren gler seg over at milepælen no er nådd og seier dette gjev Mållaget ein styrke i kampen for nynorsken og dei norske dialektane.
– Neste år kjem regjeringa med framlegg til ny opplæringslov. Mållaget treng høge medlemstal i ryggen når vi skal kjempa for viktige gjennomslag for nynorsken, seier Peder Lofnes Hauge. (©NPK)
