NRK lyser no etter eigen språksjef som skal vere med og halde NRK oppe som normdannar for det norske språket.
Det skal i tillegg opprettast eit nytt språkstyre i organisasjonen. Programsjef Per Arne Kalbakk, som skal leie det nye språkstyret, seier til Aftenposten at ein med dette ønskjer å tydleggjere at språk er eit redaktøransvar i NRK.
Den nyoppretta stillinga som språksjef skal erstatte tidlegare ordningar kor NRK har brukt språkkonsulentar frå høgskulane og universiteta. Eksterne konsulentar vart for distansert, no vil ein få språkarbeidet nærmare det daglege virket, seier Kalbakk.
Søknadsfristen på stillinga er neste veke, og NRK jaktar no på ein person som i tillegg til å ha god språkkunnskap også er oppdatert på journalistisk arbeid, digitale medium og offisiell norsk språkpolitikk.
