Kristin Maurstad (32) frå Vågsøy er konstituert som statssekretær for nærings- og handelsminister Trond Giske.
Det er vikariatet Roger Ingebrigtsen har hatt, som Maurstad no skal ta over.
– Dette er draumedepartementet når eg først skulle få sjansen. Det er slike ting ein ikkje torer å drøyme om, og eg er utruleg audmjuk og glad, seier ho til Firda.
Maurstad er varaordførar i Vågsøy kommune, styremedlem i Sogn og Fjordane Ap og står på tredjeplass på stortingslista til Sogn og Fjordane Ap. Til dagleg jobbar ho som prosjektleiar i Fram Flora, som er næringsselskap for Flora kommune og næringslivet i Flora. (NPK)
