Kim André Rysstad kjem frå tjukkaste folkemusikkland, syng på nynorsk og skal vere med i neste års Melodi Grand Prix.
Han er med i musikktevlinga med songen «Så vidunderleg», som er skriven av Elin Nygård, som også har skrive fleire songar for artisten Helene Bøksle.
– Eg trur eg kan vinne, fordi det er ei fengande låt. Refrenget sit kjapt, seier Rysstad til Aftenposten.
30-åringen frå Setesdal har bachelor i folkemusikk frå Bergen og har vore profesjonell folkemusikar i fleire år. Hausten 2007 gav han ut debutalbumet «Tak hardt uti hand». Debutalbumet blei kåra til «Årets soloalbum» under bransjetreffet Folkelarm i 2008. I haust kom den andre plata «Vegen».
– Eg synest det er fint å synge på nynorsk. Det ligg nært opp til dialekta mi. Setesdal er den «djupaste» dalen for folkemusikk, seier folkesongaren vidare til Aftenposten.
Rysstad kjem i desse dagar frå turné i Kina. I 2009 blei han kåra til Årets unge folkemusikar av Rikskonsertene og folkemusikkorganisasjonen FolkOrg.
På My Space kan du høyre songar frå den første plata til den anerkjente folkemusikaren.
