– Me går frå å vera ein bokmålsskule, til å verta ein nynorskskule, seier rektor Knut Ole Myren ved vaksenopplæringa i Sogndal.
Tysdag hadde den rykande ferske nynorskgruppa sin første time, skriv Sogn Avis.
– Me tek nybyrjarane først. Det vart for voldsomt å ta alle i eitt jafs, men planen er at bokmål gradvis skal fasast ut og nynorsken ta over, seier rektoren.
Dei som ynskjer det vil framleis få tilbod om nynorsk, men erfaringar frå Førde og Gloppen tilseier at det stadig blir færre av dei som vil ha bokmål.
Les også: Nynorsk pluss – litt til…
For sogndalordførar Jarle Aarvoll er dette gode nyhende, og meiner det vil vere ein styrke for denne gruppa å få undervisning på nynorsk.
– Med sognamaol vil du kome deg heilt til Konstantinopel. Då vil du òg koma langt med nynorsk, seier Aarvoll til Sogn Avis.
Lærarane er derimot meir skeptiske, dei er ikkje minst uroa over mangelen på undervisningsmateriell på nynorsk.
– Me skal undervisa både analfabetet og professoren. Det er ikkje det mangfaldet å ta av på nynorsk, som på bokmål, seier lærar Kirsti Loftesnes.
