Dei flinkaste nynorskelevane finn vi i Hordaland, og dei gjer det jamt over betre enn bokmålselevane på mange område, melder Framtida.no.
Nynorskelevane i vidaregåande skule i Hordaland har både høgare snittkarakter og lågare strykprosent enn bokmålselevane. Standpunktkarakteren for nynorskelevar ligg i snitt på 3,96, medan bokmålselevane har eit snitt på 3,90. Strykprosenten ligg på høvesvis 1,69 for nynorskelevar og 2,01 for bokmålselevar. Omlag kvar femte elev i vidaregåande skule i Hordaland bruker nynorsk i skulen.
Opplærinsgdirektør Svein Heggheim i Hordaland fylkeskommune meiner desse tala burde vere god drahjelp for nynorsk.
– Her har vi gode argument for å velje nynorsk som språkform i skulen. Dette burde auke rekrutteringa til nynorsk, men vi må òg leggje til at streiken førte til at 3500 eksamenar gjekk ut i Bergen, seier Heggheim.
