Teikna nynorskvitsar gjorde med eitt nynorsk grammatikk meir populært enn vanleg på Facebook.
Dei humoristiske tekneseriestripene som Nynorsksenteret ved Høgskulen i Volda la ut på Facebook førre veke, er henta frå det nye og utvida undervisningsheftet «Nynorsk på 1-2-3». Heftet er mynta på skuleklassar, men teikneseriane viste seg òg å slå an på Facebook, fortel nettavisa Framtida.no.
Mange viste seg å like teikninga som demonstrerer skilnaden på «her har eg skrive» (på ei tavle) og «her har eg skrevet» (skrittet), ord som mange har lett for å blande saman på nynorsk. På kort tid vart innlegget delt 100 gonger, og 130 brukarar gav det tommelen opp.
Eit anna eksempel på den pedagogiske humoren er forskjellen på «den glade bodskap», til dømes å bli lottmillionær, og «den glade buskap», framstilt som danseglade kyr på diskotek.
Det er nettopp slike typiske feil rådgivar Arild Torvund Olsen ved Nynorsksenteret ønskjer å komme til livs med humorteikningane.
– Når vi les nynorsktekstane til elevar og andre, ser vi at det stort sett er nokre få feil som går igjen. Tanken bak «Nynorsk på 1-2-3» er å nytte humor og visualisering for å hjelpe folk å styre unna desse vanlege nynorskfeila, seier Olsen til Framtida.no.
Olsen meiner Facebook eignar seg godt til å korrigere slike enkle feil på humoristisk vis, og seier at dette er noko Nynorsksenteret kjem til å gjere meir av framover. Men til dei meir kompliserte rettskrivingsreglane passar nok papir betre, trur han.
Olsen har utvikla manuset til heftet saman med Ingrid Slettevoll, mens Kristoffer S. Mathisen har stått for illustrasjonane. (©NPK)
