– Det burde vere sjølvsagt at jamstillingsvedtaket viser att i praksis også for den fremste juridiske teksten i landet, meiner rådet i Nynorsk kultursentrum.
I eit brev til kontroll- og konstitusjonskomiteen oppmodar dei no Stortinget til å vedta Grunnlova på moderne nynorsk og bokmål.
Dei 22 medstiftarane i stiftinga Nynorsk kultursentrum meiner det no er på tide at Stortinget lar mållova gjelde ikkje berre formelt, men òg i praksis og ber dei folkevalde om å vedta moderniseringsframlegga frå Graverutvalet.
– Å gjere Grunnlova tilgjengeleg på både bokmål og nynorsk er å gjere grunnlaget for folkestyret tilgjengeleg for veljarane og for eit enda betre ordskifte om demokrati på norsk, skriv styreleiaren i rådet, fylkesmann i Møre og Romsdal og tidlegare stortingsrepresentant for Framstegspartiet Lodve Solholm; rådsordførar, fylkesvaraordførar i Hordaland Mona H. Hellesnes (V); og direktøren i stiftinga, Ottar Grepstad.
I rådet er mellom anna universiteta i Oslo, Bergen, Trondheim, Tromsø, Det Norske Teatret, Det Norske Samlaget, Landssamanslutninga av nynorskkommunar, Noregs Mållag og fylkeskommunane Møre og Romsdal, Rogaland, Sogn og Fjordane og Hordaland representerte.
Stortinget skal behandle framlegga til revisjon av Grunnlova 6. mai, men så langt ser det ikkje ut til at nokon av moderniseringsframlegga får stor nok støtte. Både Høgre, Venstre og KrF har signalisert at dei ikkje ønskjer nokon språkrevisjon i det heile. Berre dei raudgrøne partia og Miljøpartiet Dei Grøne har så langt støtta framlegga frå Graverutvalet. (©NPK)
