No har det kome ut eit aktivitetshefte for barn som er i ferd med å lære seg å lese. Heftet kjem på nordsamisk, nynorsk og bokmål og heiter Alle gode ting.
I tillegg har det og det siste året kome ei ny fireårsbok på nord- og lulesamisk med ein song-CD til, som vart gjeve ut på IKO-forlaget. Det er også forventa at det skal gjevast ut ei ny nordsamisk konfirmantbok i desember i år. Det melder kyrkja.no.
– Det er svært gledeleg at vi har byrja å få ein del materiell på samisk til ulike aldrar. Eg vil spesielt rose Alle gode ting som eit døme på inkludering. Den har same illustrasjonar i alle språkvariantar, og illustrasjonar frå samisk kontekst, seier trusopplæringsrådgivar i Samisk kyrkjeråd, Stein-Erik Anti.
Materialet blir teke godt i mot rundt omkring i forsamlingane. I Kautokeino har menigheitskontoret ein liten bokhandel der folk kan kjøpe kristne bøker på samisk.
– Det er veldig viktig at bøkene er på samisk for at borna skal kjenne at stoffet er noko som angår dei. Samstundes er det ein fordel at bøkene ikkje berre er omsett frå norsk, men tilrettelagt for ein samisk kontekst, seier sokneprest Bjarne Gustad Gustad. (KPK)
