Oppussinga av barndomsheimen til diktaren Jakob Sande i Fjaler har skapt strid i Jakob Sande-selskapet. Det har ført til skiping av ein mot-organisasjon
Margrete Reisæter, leiar i Sande-selskapet, seier til NRK at målet med ombygginga er å gjere diktarheimen meir besøksvenleg.
– Eg gler meg over at det skjer ei forandring her og at vi får eit funksjonelt bygg. Det blir gode moglegheiter for drifta vår vidare.
Men dette er ikkje medlem i Sande-selskapet, Torodd Fagerheim, samd i. Han har lenge vore ein viktig Jakob Sande-forkjempar og reagerer sterkt på den nye utbygginga.
– Dette er ein skandale. Dei har reinska ut alt som er innvendig slik at det berre er dei innvendige konstruksjonane igjen av det gamle bygget. Dette er rett og slett å vanære Jakob Sande sitt ettermæle.
Fagerheim hevdar at vesentlege delar av planlegginga har gått føre seg i det stille, både for store delar av Sande-selskapet og til og med for kommunen. Han kallar dette ei stor konflikt, og har no laga ein motpart til selskapet. Den nye organisasjonen er oppkalla etter barndomsheimen til diktaren og har fått namnet «Klokkargardens Vaktlag».
Fjalerordførar Arve Helle avviser kritikken. Han seier at barndomsheimen til Sande slett ikkje er rasert, men at klokkargarden er gjennom ei nødvendig oppussing.
– Dette er totalt ute av proporsjonar når ein kan hevde slikt som dette. Eg klarer ikkje med min beste vilje å sjå katastrofen som Fagerheim skildrar.
Eg føler meg trygg på at dette er gjort i samsvar med retningslinjer som gjeld, seier Helle til NRK Sogn og Fjordane. (NPK)
