Ørnulf Opdahl skal vere festspelutstillar under Dei nynorske festspela 26.–29. juni 2014. Opdahl kjem frå Ålesund og er kjend langt utover Noregs grenser for tolkingane sine av den mektige, vestlandske naturen.
«Motiver som går igjen, er den ensomme vandrer, stupbratte fjellsider, møte mellom hav og himmel, lys og mørke, det vide utsynet og en nærmest våt følelse av vær og vind,» skriv nettstaden fineart.no.
I perioden 1985-1992 var Opdahl professor ved Kunstakademiet, og i 1998 var han festspillutstiller i Bergen. Han har fått Ålesund bys kunstnerpris og Møre og Romsdal fylkes kulturpris, og har i alle år hatt eit tett utstillingsprogram i inn- og utland. Han har utført utsmykkingar mellom anna for Stortinget, Telenor, Norges Bank og Universitetsbiblioteket i Oslo.
I dag er han representert i ei rekkje norske museum og samlingar, mellom andre Nasjonalmuseet for kunst, Bergen Kunstmuseum, Astrup Fearnley Museet for Moderne Kunst og Stenersenmuseet. I 2006 blei Opdahl også innkjøpt av British Museum.
Makt på Dei nynorske festspela
Grunnlovsjubileet neste år har inspirert festspelarrangøren til å velje makt som tema. – Makt gir oss store rom når vi skal fylle dei ulike programpostane, og vi vil gi publikum både gode festivalopplevingar og eit par kraftfulle debattar, seier dagleg leiar Gaute Øvereng i Ivar Aasen-tunet. Dei nynorske festspela vil som tidlegare innehalde konsertar, litteratur, samtalar, kunst og eigne program for barn og unge. Festspela blir arrangert i Ivar Aasen-tunet og andre stader i Ørsta og Volda 26.–29. juni 2014 og heile programmet blir lansert 9. april.
