Komplett publikumstilbod ferdig til Ulvik poesifestival.
– Utstillinga blir ei spanande reise inn i poesiverda, der alle gjestene kan oppdage noko nytt om lyrikk og Olav H. Hauge, seier dagleg leiar Geir S. Netland, som ser fram til å gje publikum eit komplett tilbod i Ulvik. Den offisielle opninga av Olav H. Hauge-senteret blir torsdag 4. september. Hauge-senteret kan då presentere eit komplett tilbod, med ny basisutstilling om Olav H. Hauge sitt liv og verk. Utstillinga vil også vise lyrikk i mange former på tvers av språkgrenser. I utstillinga vil publikum bli kjende med ulike sider av Olav H. Hauge og få fleire inngangar til det lyriske universet hans.
Den opphavlege planen var utstillingsopning i mai, men ein ønskjer å bruke meir tid på å kvalitetssikre innhald og utstillingselement. Det vil seie at Olav H. Hauge-senteret opnar med eit samla publikumstilbod i september, som mellom anna inkluderer ny utstilling, nytt formidlings- og kulturprogram, ny resepsjon og museumsbutikk. Den grøne kafé er allereie på plass i senteret med ein ekstern drivar.
Den offisielle opninga blir no dagen før Ulvik poesifestival som Hauge-senteret arrangerer frå fredag 5. til søndag 7. september. – Vi håper med dette å trekkje endå fleire gjester og tilreisande til poesibygda Ulvik og ei innhaldsrik festivalhelg, seier Netland.
Det var utstillingsprodusenten SixSides som vann anbodskonkurransen om utforming av basisutstillinga. SixSides er ein av dei leiande aktørane i Norge når det gjeld utvikling og design av profesjonelle og opplevingsrike møtestader, og står mellom anna bak det nye Arbeidermuseet i Oslo og Rock City i Namsos.
