Heim Nyhende Osterøy satsar friskt på original bokbuss

Osterøy satsar friskt på original bokbuss

Med ein kunstnardekorert buss, digitale skjermar utanpå og inni og lys som skiftar farge etter litterære tema, går Osterøy nye vegar for å lokka barn og unge til å lesa.

 

– Vi veit at vi konkurrerer med svært mange andre element om merksemda til barn og unge. Difor er det viktig at dei får lyst til å koma til bibliotekbussen, seier biblioteksjef Bente Dammen ved Osterøy bibliotek til Nynorsk pressekontor om storsatsinga som blir lansert 25. august.

Når barna først får oppleva den nye bibliotekbussen, har ho stor tru på at dei vil lika seg og vil koma tilbake. I tillegg til fargerike og dekorative illustrasjonar av kunstnaren Anne Fiske – og ei rekkje effektar – har bussen tipp topp moderne elektronisk utstyr av alle slag.

Lang tradisjon

Osterøy bibliotek har lang tradisjon for å driva med lesestimulering og nyskapande kulturprosjekt. Den førre bokbussen deira, Soria Moria, vart kåra til den vakraste bokbussen i Norden. Bussen står no på museum.

Medan mange andre kommunar kuttar både bibliotekfilialar og bokbuss, var det aldri på tale at den gamle bokbussen på Osterøy ikkje skulle erstattast.

– Det var ikkje nokon stor diskusjon, seier Dammen. Ho fortel at bokutlånet på Osterøy i mange år har vore svært høgt og at politikarane difor var velvillige til å løyva pengar til ein ny bibliotekbuss.

– Bokutlånet har i mange år lege på rundt 20 bøker per barn kvart år. Det er omtrent på nivå med Finland og blir rekna for å vera svært bra, seier ho.

Ny satsing

Med den nye bibliotekbussen sin ønskjer Osterøy bibliotek å formidla litteraturen på ein kreativ, god og morosam måte.

– Gode formidlarar er eit viktig nøkkelord, meiner Dammen. Biblioteksbussen vil mellom anna ta i bruk «standup»-formidling av barnelitteratur og andre stunt med profesjonelle formidlarar.

Bussen har også eit eige fortelt der det blir mogleg å driva med dataspel, film eller andre digitale aktivitetar.

Som den første bokbussen i Noreg er den nye biblioteksbussen på Osterøy også utstyrt med ein sjølvbetent utlåns- og innleveringsautomat.

Bussen har dessutan solcellepanel på taket for å gje straum til alt det digitale, ledlysa og lyssetjing av veggene som kan skifta farge etter litterære tema og kva stemning som er på turen. (©NPK)

NYNORSK INSPIRASJON

Språklova: Dette er dei viktige paragrafane for nynorskkommunane

Frå og med 1. januar 2022 er nynorsk og bokmål formelt jamstilte og likeverdige språk på alle samfunnsområde. Formålet med lova er...

Har kommunen din levert høyringssvar om ny opplæringslov?

Arbeidet med ny opplæringslov er svært viktig for nynorskelevane og nynorskkommunane. LNK oppmodar alle medlemskommunane sine om å setja tydelege krav til...

Nytt samarbeid skal styrka nynorsken i barnehagane

Pirion og Sunnfjord kulturskule har laga til ei digital kursrekkje som skal hjelpa til med å styrkja nynorskarbeidet i barnehagane.

Seks fine julebøker på nynorsk

Mange skular og barnehagar bruker adventstida til høgtlesing kvar dag. Her får du tips til fleire gode bøker på nynorsk med god...

Vil gi utviklingsstøtte til fleire nynorske produksjonar i Den kulturelle skulesekken

Kulturtanken, Seanse, Høgskulen i Volda og fleire fylkeskommunar samarbeider om å få meir nynorsk i Den kulturelle skulesekken i ei heilt ny...

Voss herad er Årets nynorskkommune: – Det same som verdsmeister i nynorsk

Kulturdepartementet heidrar Voss herad for klar og tydeleg informasjon på nynorsk under koronakrisa. – OL-og VM-medaljer har me i bøtter...

MEST LESE

Gratis boktips til nettsidene til bibliotek og skular

No kan du få siste bokmeldingar, bokomtalar og forfattarintervju frå Lesedigg.no direkte inn på nettsidene til biblioteket eller skulen din. I juni opna den nye...

125 årsjubileum for Tarjei Vesaas : – Kanskje den fremste litteraturen som er skriven i dette landet

Som tenåring gjekk Tore Renberg til lokalavisa for å kjøpe eit portrett av forfattaridolet sitt, medan kultur- og likestillingsminister Anette Trettebergstuen framleis sit med...

Språksjov-Linda vedgår: – Mange vil gjerne inn i skåpet mitt

Dette er det andre intervjuet i årets sommarserie. Mykje moro og mange bilete av den fargerike vossingen og sjefen for den populære...

Guri Vesaas får Storegutprisen under Litteraturdagane 2022

På Litteraturdagane i Vinje blir tidlegare redaktør i Det Norske Samlaget, Guri Vesaas, heidra med Storegutprisen. Ho får prisen spesielt for den...