Ove Eide frå Sandane er heidra med ein nyoppretta pris frå Landslaget for norskundervisning (LNU) for det mangeårige arbeidet og engasjementet sitt for norskfaget i skulen.
– Det er ei stor ære å bli heidra av kollegaer og fagfeller, seier prisvinnaren i ei pressemelding.
I kriteria heiter det at prisen kan gå til «ein person eller institusjon som har levert viktige bidrag til norskfaget, ein person som har utmerkt seg gjennom framståande didaktisk praksis eller som har gjeve særlege bidrag til å spreie kunnskap om norsk språk og litteratur og kunnskap om undervisning i dette.»
– Ein institusjon
– Ove Eide oppfyller alle dei moglege kriteria for tildeling, seier styreleiar i LNU, Lars August Fodstad. Han meiner prisvinnaren nærmast må kunna kallast ein institusjon i norskfagleg samanheng.
Han peikar på har Eide har vore med i mange grupper og komitear for å utvikla norskfaget. Prisvinnaren var mellom anna med i læreplangruppa for Kunnskapsløftet. Han var også medforfattar av rapporten «Framtidas norskfag». I mange år har han også vore med på å utforma eksamensoppgåvene i norsk. For tida leier han fagrådet for skule og offentleg forvaltning i Språkrådet.
Ved sida av alle desse oppgåvene har Ove Eide heile tida halda stand i klasserommet.
– Det gjer prisvinnaren unik i norskfagleg samanheng, meiner Fodstad. (©NPK)
