Heim Innspel Jamvekt og overvekt

Jamvekt og overvekt

Fleire og fleire er opptekne av å halde jamn vekt, mens det kanskje er stadig færre som har jamvekt.

I språkvitskapen snakkar ein gjerne om «jamvektlova». Dette høyrest kanskje veldig alvorleg ut, men ein får ikkje akkurat problem med politiet om ein bryt denne lova. Det dreier seg berre om ein språkleg regel som først og fremst gjeld austnorske dialekter og trøndsk, med nokon utstikkarar nordover og vestover.

Jamvektlova resulterer blant anna i det vi kallar «kløyvd infinitiv». Det er nok fleire som har høyrt om dette fenomenet. «Kløyvd» tyder i dette tilfellet det same som «spalta» eller «delt i to». Infinitivar er dei verbformene som er ubøygde, og som kan stå etter infinitivsmerket (subjunksjonen) «å»: å lese, å skrive, å gjere, å køyre.

I bokmål, altså i skriftspråket, endar alle infinitivar på –e. I nynorsk finst det ein del valfridom når det gjeld infinitivsendinga. Infinitiven kan anten ende på –a, på –e, eller ein kan bruke kløyvd infinitiv, det vil seie både –a og –e, men etter visse reglar. Bokmål hadde også kløyvd infinitiv fram til 2005, men den moglegheita er fjerna no.

I gammalnorsk enda alle infinitivane i utgangspunktet på –a, akkurat som dei framleis gjer i svensk. Men «klassisk» gammalnorsk endra seg og blei splitta i fleire og fleire dialekter, blant anna fordi vokalar i trykklette stavingar kunne bli reduserte til ein e-lyd. Sidan infinitivane enda på –a, kunne dei altså etter kvart ende på –e.

I norske dialekter skil ein i dag først og fremst mellom sørlandsk med e-infinitiv, sørvestlandsk og vestlandsk frå Rogaland og nordover med a-infinitiv, og så kjem e-infinitiven tilbake og går heilt opp til Finnmark. Austlandet og Trøndelag, inkl. Nord-Møre har kløyvd infinitiv. Dette tyder at nokre dialekter heldt på den gamle a-endinga, mens andre dialekter fekk ei svekking til –e i alle formene, mens altså austnorske dialekter og trøndsk fekk ei deling.

Grunnen til dette er å finne i dei gammalnorske stavingane. Det viser seg då at ord med kort vokal og kort konsonant føre endingsvokalen hadde meir eller mindre same vektfordeling (jamvekt) i stavinga, mens alle andre lydkombinasjonar resulterte i overvekt. Det var då berre orda med overvekt som fekk redusert endingsvokalen til –e, mens jamvektsorda heldt på a-en. Derfor skil ein mellom verbformer som gjera, vera, lesa, tala med a-endingar og køyre, elske, skrive, snakke med e-endingar. Det er dette vi kallar kløyvd infinitiv, og regelen som forklarer fordelinga av a- og e-endingar, kallar vi for jamvektslova.

No blir ein verken slankare eller tjukkare av å vite om jamvektlova. Men det er kanskje litt «kult» å kunne forklare korfor ein har kløyvd infinitiv i austnorsk og trøndsk. Og den som skjønner at dette er ein fonologisk regel (lydregel), vil kanskje lettare halde på dialekta i staden for å tru at det er skriftspråket som alltid «har rett».

NYNORSK INSPIRASJON

Kurstilbod for skular og barnehagar

Arbeidet for å styrkja språkopplæringa i det offentlege er ei prioritert oppgåve for Landssamanslutninga av nynorskkommunar (LNK). Kursa våre blir administrerte og gjennomførte av Fretland...

Språklova: Dette er dei viktige paragrafane for nynorskkommunane

Frå og med 1. januar 2022 er nynorsk og bokmål formelt jamstilte og likeverdige språk på alle samfunnsområde. Formålet med lova er...

Har kommunen din levert høyringssvar om ny opplæringslov?

Arbeidet med ny opplæringslov er svært viktig for nynorskelevane og nynorskkommunane. LNK oppmodar alle medlemskommunane sine om å setja tydelege krav til...

Nytt samarbeid skal styrka nynorsken i barnehagane

Pirion og Sunnfjord kulturskule har laga til ei digital kursrekkje som skal hjelpa til med å styrkja nynorskarbeidet i barnehagane.

Seks fine julebøker på nynorsk

Mange skular og barnehagar bruker adventstida til høgtlesing kvar dag. Her får du tips til fleire gode bøker på nynorsk med god...

Vil gi utviklingsstøtte til fleire nynorske produksjonar i Den kulturelle skulesekken

Kulturtanken, Seanse, Høgskulen i Volda og fleire fylkeskommunar samarbeider om å få meir nynorsk i Den kulturelle skulesekken i ei heilt ny...

MEST LESE

– Den nye opplæringslova er ikkje god nok for nynorskelevane

Fredag 24. mars 2023 la Tonje Brenna fram forslag til ny opplæringslov. Norsk Målungdom synest det er fleire gode framlegg for nynorskelevane, men at...

Målblome til ålesundordførar Eva Vinje Aurdal

– Norske kommunar er viktige språkaktørar, og mellom 356 nyansar av kommunegrått har språket vårt både bøller og bestevener. Midt i det grå står...

LNK om ny opplæringslov: – Stortinget må sikra meir nynorsk i skulen

Nynorskkommunane (LNK) er glad for at regjeringa vil lovfesta at skulen skal ha skriveprogram som støttar nynorsk, men meiner lova må oppdaterast for å...

Mållaget: – Ny opplæringslov forsterkar den digitale læremiddelkrisa for nynorskelevane

– Situasjonen i nynorskklasseromma er alvorleg. Det sit over 73 000 nynorskelevar ved pultane sine og må bruke digitale læringsressursar på feil språk, seier...