53 prosent av folket bur i ein kommune der Høgre har ordføraren. Arbeidarpartiet har mista sin i minst 20 kommunar, medan vesle Sp har 87 ordførarar – berre to færre enn sist.
Snart ein månad etter kommunevalet blir det framleis forhandla i 13 kommunar. Likevel er det alt klart at Høgre har fått 118 ordførarar, 38 fleire enn ved sist val. Ap får derimot langt færre enn dei hadde, trass i eit betre val enn på lenge. Til no har partiet 152 ordførarar, mot 181 etter førre kommuneval.
Partisekretær Raymond Johansen i Ap seier til NRK at partiet kanskje ikkje har vore gode nok til å forhandle etter valet.
– For det første har SV gjort eit dårleg val. Der vi har samarbeidd med dei, har vi tapt fleirtalet. Enkelte stader har dei andre partia funne saman og gått imot oss, seier Johansen. Han peikar likevel på at Arbeidarpartiet har flest ordførarar, og at dei er det største partiet i landet.
Ifølgje oppteljinga til NRK har KrF førebels 20 ordførarar, Frp 11, Venstre 9, SV 2 og lokale lister har 17. (NPK)
