Bokmålskilta på vegstrekninga mellom Stord og Bergen er nå bytta ut med nynorske skilt. Statens vegvesen fekk for nokre veker sidan refs frå Språkrådet for bokmålsskilt i nynorskkommunar.
For tre veker sidan skreiv avisa Sunnhordland om nynorskforkjempar Erlend Bakke (46) frå Askøy som hadde registrert ei rekkje skilt teksta på bokmål i fleire kommunar som har nynorsk som tenestemål.
Bakke skreiv brev til Språkrådet, som igjen tok affære overfor Statens vegvesen – som på si side la seg flate og lova å ordna opp. Dette skreiv også LNK.no om i september.
Det har dei nå gjort, for i går observerte ein av Sunnhordland sine faste tipsarar på strekninga Stord-Bergen at nynorske skilt var på plass i 60-sona ved Engevik.
– Det må ha blitt montert måndag, for i helga var skilta på bokmål. Uansett: Dagens ros går til Statens vegvesen, for rask handling, skriv Sunnhordland i dag onsdag.
