Ei kartlegging i avisa Mandag Morgen viser at berre 30 prosent av ordførarane går klart i mot samanslåing med ein eller fleire nabokommunar.
57 prosent meiner slike prosessar må vere frivillige, medan 40 prosent opnar for tvang som siste utveg, skriv Nationen. Sidan 2000 har det berre vore fem kommunesamanslåingar, og Noreg har i dag 430 kommunar.
Statssekretær Dag-Henrik Sandbakken (Sp) i Kommunal- og regionaldepartementet meiner tala er positive.
– Sjølv om nesten fire av ti opnar for andre løysingar, er det stor tilslutnad til at kommunesamanslåingar må vere frivillige. Tvang kan skape så sterke motkrefter at dei gode intensjonane blir forkludra, seier han til Nationen.
Per Willy Amundsen (Frp) meiner derimot det er lovande at så mange meiner det kan vere naudsynt med tvang.
– Som ordførar kan ein av og til ha eit navlegranskande syn på dette. Difor er det interessant at så mange kan godta tvang. Det viser at det er stor grad av realisme der ute, seier Amundsen til Nationen.
