Før sommaren bestemte kommunestyret i Tromsø at byen skulle søke om å få bli med i samisk forvaltningsområde for språk. Det ville likestilt samisk og norsk språk i byen. Men det nye kommunestyret med borgarleg fleirtal har no vald å trekkje søknaden, fortel NRK.
Samane i Tromsø er svært misfornøgde med avgjerda og planlegg no ein demonstrasjon for å vise kva dei synest om saken.
– Den politiske leiinga i Tromsø set pris på at kuftekledde samar trekkjer turistar. Men ein vil ikkje ha eit levande samisk språk og kulturliv her. Det er rystande at ein ikkje får vere seg sjølv, seier Max Machke til NRK Troms og Finnmark.
Byråd for næring, kultur og idrett, Jonas Stein Eilertsen (V), seier at dette handlar om at ein ikkje veit kva økonomiske konsekvensar ei slik innmelding ville hatt, og at ein reint prinsipielt ønskjer mindre statleg styring i byen.
Av dei rundt 70 000 innbyggjarane i Tromsø er vel 1 000 meldt inn i samemanntalet. Byen har frå før samisk skilting i Tinghuset, på Alfheim stadion og på Universitetssykehuset Nord-Norge (UNN).
