Vest-Telemark vil la tilflyttarar prøvebu i eigne bustader for å sjekke om dei trivst på landet.
Ideen med ein prøvebustad er å minske risikoen ved å flytte til ein ny stad, skriv Vest-Telemark Næringsutvikling på nettsida si.
Bustadene er meint som eit tilbod til folk som ynskjer å flytte til regionen, men som fyrst vil bu der ein avgrensa periode for å sjekke ut om dei trivst, for så å kjøpe eller byggje eigen bustad.
Prøvebustadene skal liggje i nærleiken av sentrale institusjonar som skule, barnehage, grendehus og butikk. Målet med dette er å leggje til rette for at dei som prøvebur raskt skal bli integrerte i det sosiale nettverket på staden, slik at sjansen for at dei blir verande aukar.
Den fyrste, og til no einaste, prøvebustaden i Vest-Telemark vart bygd i Øyfjell i Vinje, og var innflyttingsklar til skulestart 2010. Dei kommunane som no vurderer prøvebustader, er Seljord, Kviteseid og Hjartdal.
Målgruppa er unge etableringsklare familiar som ynskjer seg ut av byen. Prosjektet er unikt både nasjonalt og internasjonalt, ifølgje nettsida. (NPK)
