Filmen Få meg på, for faen, basert på Olaug Nilssens roman med same namn, er som første norske film nokon gong tatt ut til hovudkonkurransen i den prestisjetunge filmfestivalen Tribeca som no pågår i New York.
Filmen hadde premiere under opninga av festivalen påskeaftan. Etter premieren seier bransjebladet Variety at det er ein søt og ærleg film som behandlar ungdommane med ein respekt tenåringsfilmar frå Hollywood ser ut til å vere allergiske mot. Også Huffington Post peiker på evnen filmen har til å gjere ein langt betre og meir sjarmerande jobb med å portrettere det lidande kapittelet i livet ungdomstida kan vere enn andre filmar i sjangeren.
Filmen er ein av 12 filmar som vart plukka ut blant 5 000 innsendte filmar til å delta i hovudkonkurransen i Tribeca, og det er ifølgje NRK Sogn og Fjordane første gong at ein norsk film er med i denne konkurransen. Filmen, som har fått det engelske namnet Turn me on, goddammit, konkurrerer om fleire prisar under Tribeca-festivalen.
Filmen Få meg på, for faen vart laga på Sand i Ryfylke i fjor og kjem til å ha Noregs-premiere i august i år. Boka Få meg på, for faen kom ut i 2005, og vart også dramatisert på Det Norske Teatret i 2007.
