Norske kommunar si rapportering til staten krev 700 årsverk og kostar 379 millionar kroner i året.
Dette kjem fram i ei ny undersøking som PwC har gjennomført for KS og Kommunaldepartementet, skriv Kommunal Rapport på sine nettsider. Kommunalt rapporteringsregister har meint at rapporteringa krev 193 årsverk.
Rapporteringa frå kommunane til staten er eit stort system med 80 ordningar som er definert i lover eller forskrifter. Meir enn 5000 forskjellige datapunkt blir samla inn i dette systemet, og kommunane må melda frå om alt frå frøsettinga til skogstrea til skogsvegar bygt utan tilskot.
Undersøkinga viser vidare at viss denne rapporteringa hadde vore frivillig ville 19 prosent av kommunane gitt lite eller ingen informasjon til staten om kva dei driv med.
KS og staten har lenge diskutert kor mykje tid og pengar kommunane bruker til rapporteringa, og om ho er nyttig. Nå er dommen klar. Han viser at rapporteringa krev mykje meir tid og ressursar enn den instansen som tar imot det meste av informasjonen har hevda.
KS fryktar at rapporteringa skal ta tid og pengar frå brukarane av pleie, omsorg, skule og barnehage.
