I 1977 vedtok politikarane i Oslo at bokmål skulle vere offisielt administrasjonsspråk. No føreslår partiet Raudt å oppheve vedtaket, melder ABC Nyheter.
Bokmålsvedtaket frå 1977 tyder at dei tilsette ikkje kan bruke nynorsk i jobben sin.
– Noreg er i den heldige situasjon å ha to jamstilte skriftspråk, som begge er ein viktig del av kulturarven vår. Oslo kommune, som landets hovudstad, bør vera språknøytral langs heile lina.
Slik heiter det i forslaget frå Raudt, og som truleg skal handsamast i Finanskommiteen i mars.
Ingrid Balterzen i Raudt seier til nettavisa at Oslo kommune er språkleg nøytral i sin kommunikasjon med statlege organ, og partiet ønskjer no at dei tilsette i Oslo kommune også skal få byrje bruke den målforma dei ønskjer i brevveksling, interne dokument og utgreiingar.
