Ravatn kan vinna internasjonal litteraturpris

Nynorskforlaget Samlaget kan notere seg at dei har to forfattarar inne på langlista til prestisjeprisen Dublin Literary Award.

Både Brit Bildøen og Agnes Ravatn er med når langlista med forfattarar som har ein sjanse til å vinne Dublin Literary Award er klar. Dei er inne med høvesvis «Sju dagar i august» og «Fugletribunalet».

• Les også: Me intervjua forfattaren og omsetjaren då Fugletribunalet kom på engelsk

Også Cappelen Damm kan notere seg at ein av forfattarane deira er med.

Ikkje berre blei Roy Jacobsen nyleg kortlista til den internasjonale Man Booker-prisen. No er romanen «De usynlige» også med på langlista til Dublin Literary Award.

Det er tredje gong Roy Jacobsen er nominert til denne prisen.

• Få med deg vårt intervju med Agnes Ravatn: – Eg blir sur på at folk ikkje kan vera litt rause og gi kvarandre kompliment

Dublin Literary Award blir delt ut årleg til ein roman som er publisert på engelsk. Prisen består av 100.000 pund og blei første gong delt ut i 1996.

I april 2018 kjem kortlista mens vinnaren av prisen blir kjent 13 juni.

Frå nabolanda våre noterer vi oss at kjenningar som Minna Lindgren (Finland), Yrsa Sigurdardottir (Island) og Fredrik Backman (Sverige) har fått plass på langlista.