Leiar i Studentrådet, Jens Kihl, reagerer på heile 22 skrivefeil i ei eksamensoppgåve.
Kihl fann 22 skrivefeil i eksamensoppgåva i Sosiologi kvalitativ metode ved Universitetet i Oslo.
– Eg er overbevist om at veslesøster mi på tolv år kunne gjort det bedre. Dette er ikkje akseptabel praksis ved noregs største utdanningsinstitusjon, seier Kihl til Universitas.
Studentane har krav på å få eksamensoppgåvene på nynorsk dersom dei ynskjer det. Men Kihl legg vekt på at kvaliteten varierer, og at mange studentar har forsøkt å klage til leiinga ved universitetet, utan at noko skjer.
– Det hadde nesten vore betre dersom universitet berre gjekk offentleg ut og sa at dei ikkje var villige til å fylgje lova. Det heile grenser til diskriminering, seier Kihl til studentavisa.
Fakultetsdirektør ved Samfunnsvitenskapelig fakultet, Gudleik Grimstad, beklager situasjonen og legg vekt på at universitetet må auke nynorskkompetansen.
