Politikarane har vorte for opptekne av reformer, meiner Utdanningsforbundet i Sogn og Fjordane.
Leiar for Utdanningsforbundet i Sogn og Fjordane Gunn Marit Haugsbø fortel at fleire utkantkommunar slit med å få tak i lærarar.
– Dette må politikarane ta ein stor del av skulda for, seier Haugsbø til NRK Sogn og Fjordane.
Ho seier vidare at ho tykkjer skulen har vorte ei politisk slagmark.
– Alle partia slost om å ha den beste skulepolitikken, og så skal dei markere det gjennom ei reform, seier Haugsbø, som ikkje trur det har vore klokt for skulen.
Ho meiner også at alle reformene har svekt omdømmet og rekrutteringa til skulen.
– Omdømmet til skulen har gjort at det ikkje er attraktivt nok for ungdom å velje ei lærarutdanning, seier Haugsbø.
Stortingsrepresentant Tor Bremer (Ap) forstår Haugsbø sin frustrasjon over alle reformene.
– Eg gjev ho rett i at ikkje alle reformene har vore vellukka, seier Bremer til NRK Sogn og Fjordane. (©NPK)
Foto: MorgueFile
