Brukarane bør ikkje forvente at alle norske kommunar beherskar sosiale medium, seier Carl Christian Grøndahl, prosjektleiar for sosiale medium i Synlighet.no.
Grøndahl har tidlegare skrive masteroppgåve om kva tyding nye medium har for politisk aktivitet og deltaking, og han er ikkje overraska over at berre ein av fire kommunar bruker sosiale medium, slik mellom anna Nationen melde før helga. Sosiale medium som Facebook, Twitter, YouTube og LinkedIn krev tid og kunnskap som mange kommunar kanskje ikkje synest dei har i dag, trur han. Dermed held ein seg til dei kjende informasjonskanalane som telefon, e-post og heimesider.
– Eg har stor forståing for at ikkje alle kommunar har fått sett seg inn i korleis dei skal bruke desse nye kommunikajonsverktøya, seier Grøndahl.
Han er meir oppteken av at kommunane som ikkje bruker sosiale medium aktivt går glipp av arenaer for informasjonsutveksling og dialog. Ved å bruke Facebook og Twitter aktivt kan ein skape arenaer kor kommunen kan svare på spørsmål og få innspel frå brukarane sine.
– Ein av dei store fordelane med å kommunisere med brukarane sine på denne måten, er at når ein får svar, så får fleire svar samtidig. Det er ressurssparande.
Samstundes vil innbyggjarane gjerne oppleve å bli sett og høyrd på ein betre måte via sosiale medium.
– Kan det vere at kommunane synest det er litt skummelt å skulle byrje å kommunisere på dese plattformane?
– Det kan hende. Men då skal ein hugse på to ting: Du snakkar på vegner av arbeidsplassen din, og det du seier skal tåle å bli høyrd av mange. Legg ein seg på minnet at ein slik dialog er ein open dialog, så bør det gå greitt.
– Kor skal ein byrje, viss ein vil kome i gang med å bruke sosiale medium?
– Eg vil tilrå at ein byrjar med Facebook. For det første er det den mest brukte arenaen i dag, kor nær halvparten av Noreg befinn seg. Facebook er og lett å bruke og krev lite teknisk innsikt. Og ein av dei største styrkane til Facebook er at det er underlagt så strenge konvensjonar. Sida ser lik ut, uansett kven som brukar ho, og ho er lett å navigere i. Dessutan kan du gjere Facebook-sida di tilgjengleg også for dei som ikkje er medlemer av dette nettstamfunnet.
