– På Facebook melder vi om alt frå stengte vegar og og ledige stillingar til å bleste det kommunale informasjonsbrevet Siralappen, seier plansjef Atle Grimsby som er til stades i sosiale medium for Utsira kommune.
Tidlegare brukte kommunen mykje tid på å leggje ut saker på heimesidene sine i eit system som var tungvindt og kor statistikken viste at sakene ikkje blei leste. No går mykje automatisk ved at alt som blir lagt ut på heimesidene automatisk blir generert til Facebook via såkalla feeds, eller matingar. På same måte nyttar dei feeds frå Twitter og andre mikrobloggar for å orientere innbyggjarane sine om det som skjer i andre kommunar og på andre arenaer.
– Eg er viss om at vi har fleire treff på Facebook enn på heimesidene våre, seier Grimsby.
I den velse øy-kommunen med 215 innbyggjarar er det tre personar som deltek i sosiale medium på vegner av kommunen; ordføraren og to tilsette i kommuneadministrasjonen. Sjølv om kommunen var tidleg ute med å ta sosiale medium i bruk, har dei per i dag ikkje retningslinjer for korleis dei skal handtere dette. Gruimsby vedgår at med ein så liten administrasjon er det lett å gjere seg samde om felles køyrereglar, men han meiner likevel retningslinjer må etablerast etter kvart.
Utsira kommune ser denne digitale, sosiale omgangen med folk som ein del av omdømmebygginga si. Folk i dag er overalt, og då må kommunen vere der folk er, forklarar Grimsby og rår samstundes andre kommunar til å hive seg ut idet.
– Begynn på Facebook. Lag ei side, ikkje ei gruppe. Snakk med folk og ver tydlege på det du vil vere tydeleg på, er rådet han gir.
