At fylke blir slått saman i den nye regionreforma til regjeringa, kan bety at små parti får fleire representantar på Stortinget, ifølgje valforskar.
Klassekampen skriv at planen til regjeringa om å slå saman dei 19 fylka til «om lag ti», vil skape nye valdistrikt der regionane blir éin valkrets. Valforskar Bernt Aardal ved Institutt for samfunnsforskning i Oslo, seier dette vil kunne gi store politiske endringar.
– Mindre parti vil kunne få litt betre utteljing i nye store regionar. Det vil kunne bli eit meir proporsjonalt system, seier Aardal.
Aardal viser til eit døme der ei samanslåing av Akershus, Østfold og Buskerud vil kunne gi ein ekstra stortingsplass for Miljøpartiet Dei Grøne og Venstre i desse regionane. Med fleire mandat å fordele, vil dei små partia lettare kunne kapre dei siste mandata. (©NPK)
