Trass i at både Høgre og Frp har programfesta å leggje ned fylkeskommunen, skal han ikkje rørast i den komande kommunereforma.
Statssekretær Jardar Jensen seier til Kommunal Rapport at fylkeskommunen ikkje blir fjerna i denne perioden, og det blir heller ikkje føreslått å slå saman fylkeskommunar.
– Eg er Høgre-mann og ønskjer å fjerne fylkeskommunen. Men eg er også realist og ser at det ikkje er fleirtal i Stortinget, seier Jensen til bladet.
Statssekretæren påpeikar at den noverande regjeringa ikkje kjem til å overføre nye statlege oppgåver til fylkeskommunane. Han avslører samtidig at kommunereforma ikkje skal tvinge motvillige kommunar til å slå seg saman.
– Vi vil ikkje bruke tvang. Dei kommunane som ikkje vil vere med på denne reforma, bryr vi oss ikkje om i første omgang. Vi konsentrerer oss om dei som tek ansvar på vegner av framtidige innbyggjarar, seier Jensen til Kommunal Rapport. (©NPK)
