Fylkesplansjefen meiner at det neppe er rom for meir enn fire eller fem kommunar i Møre og Romsdal om ein skal ta signala frå regjeringa på alvor.
Fylkesplansjef Ole Helge Haugen i Møre og Romsdal fylkeskommune vågar ikkje spekulera i når kommunesamanslåing kan bli ein realitet, men han trur at det vil bli fire kommunar i Møre og Romsdal i framtida.
– Dersom ein skal oppfylle målet i regjeringa sin varsla kommunerevisjon og erstatte dagens kommunar med nye, robuste kommunar, er fire kommunar den beste løysinga, seier Haugen til NRK Møre og Romsdal.
Dei fire kommunane han ser føre seg vil vere:
– Eiksund kommune med dagens Vanylven, Volda, Ørsta, Hareid, Ulstein, Herøy og Sande.
– Ålesund kommune med dagens Stranda, Norddal, Stordal, Ørskog, Sykkylven, Sula, Skodje, Ålesund, Haram, Giske og Sandøy.
– Molde kommune med dagens Vestnes, Rauma, Nesset, Molde, Midsund, Aukra, Fræna og Eide.
– Kristiansund kommune med dagens Sunndal, Gjemnes, Rindal, Halsa, Tingvoll, Kristiansund, Averøy, Aure og Smøla.
Dei nye storkommunane vil få mellom 45.000 og 90.000 innbyggjarar.
– Å konstruere kommunar med til dømes 20.000 innbyggjarar er vanskeleg, då vert det anten 10.000 eller 40.000 innbyggjarar. Og 10.000 er for lite. 40.000 er minimum dersom vi skal gjennomføra reforma slik ho no ser ut med overføringar frå fylkeskommunane og staten til dei framtidige kommunane, seier Haugen til NRK.
