Steinriket Bømlo skal gi nye generasjonar kunnskap om ei historisk næring i kommunen.
Bømlo har gjennom tidene vore ein arena for gruvedrift og bergverk. I øykommunen har ein utvunne heile sju bergartar. Truleg er det gullfunnet på Lykling som er det mest kjende, men det har også vore gruvedrift på grønstein, ryolitt, kleberstein, kalkstein, svovelkis og granitt.
No skal det etablerast ei utstilling i Moster Amfi som skal vise fram historia om gruvedrifta. Bak Moster Amfi, som opphavleg er ei nedlagt kalkgruve, er det eit nettverk av tunnelar som vart nytta under gruvedrifta. I dag blir den eine tunnelen brukt av skodespelarar som skal opptre i amfiet. Her skal det no etter planen bli mogleg å oppleve steinhistoria.
Meininga er at skuleelevar og andre skal få oppleve dei ulike steinartane, i tillegg til at dei skal få prøve å grave etter nye funn. Det er også planlagt aktivitetar på andre historiske plassar i kommunen, som til dømes Lykling.
