– Kommunane i Sunnhordland bør satse på samarbeid for å kunne hjelpe etablerarane på den beste måten, meiner nærings – og utviklingssjef i Bømlo kommune, Magne Raknes.
Målet må vere å få på plass eit tett nettverk mellom kommunane. Slik kan ein i fylgje Raknes sikre at kommunane ikkje må sitje med dobbel kompetanse når det til dømes gjeld etablerarverksemd.
– Bømlo er gode på havbruk, medan Kvinnherad er gode på reiseliv. Med eit tett samarbeid kan kommunane dele nettverk og kompetanse, seier Raknes.
Rugekasse
Det interkommunale selskapet Samarbeidsrådet for Sunnhordland gir også i dag etablerarar rettleiing for gründerar, samstundes som dei arrangerer etablerarkurs. Selskapet har også eit regionalt næringsfond som blant anna støttar nyskapande tiltak i næringslivet. I tillegg arbeider det regionale samarbeidsorganet Atheno med å etablere inkubatorverksemder i kommunane. Ein inkubator fungerer som rugekasse og fødselshjelp for verksemder. I dag er det berre Stord, Bømlo og Tysnes som har distribuert inkubator.
– Målet er at me får på plass ein inkubator i alle kommunane. Det er ofte litt forvirrande for etablerarane. Alle vil ha dei, men samstundes er det ofte vanskeleg å vite kor ein skal ta kontakt for å få støtte, seier næringssjefen og peikar på at meininga må vere at gründeren skal få god støtte både i den enkelte kommunen og i det interkommunale organet
Utfordringane framover
Raknes legg også vekt på at næringsutvikling handlar om meir enn nyetablerarane.
– Me må også vidareutvikle dei eksisterande bedriftene. Det er ingenting som står i ro, seier han.
– Den største utfordringa for næringslivet i Bømlo no framover vert å kome over finanskrisa. Spesielt i maritim sektor, der det har blitt færre ordrar, ser ein no nokre utfordringar. Men næringslivet her har ein annan bedriftskultur enn på Austlandet o g i byane. Verksemdene her sløser ikkje med midlane, difor klarer dei også å overleve slike kriser som denne.
Magne Raknes peikar på at Bømlo har eit spreidd næringsliv med fleire mellomstore verksemder, der fleire har ein internasjonal marknad. Mellom anna viser han til verksemder som reiarlaget Eidesvik, fiskeforedlingsselskapet Salma og Servogear som gode døme.
