Ryk og reis er temaet for seminara på denne siste dagen for Falturiltufestivalen. Og kva er vel meir naturleg enn at festivaldiktar Ragnar Hovland fekk stå for den tematiske innleiinga.
– Han er utvilsamt ein av dei største fornyarane av norsk barnelitteratur, sa Per Olav Kaldestad då han introduserte festivaldiktaren.
Ragnar Hovland debuterte som barnebokforfattar i 1979 og har gitt ut 18 bøker for barn og unge. Forfattaren kunne i dag fortelje at han snart er klar med ei ny ungdomsbok. Hovudepersonen i den nye boka tar ut på ei reis for å finne att kjærasten sin. Inspirasjon til boka fann Hovland i gresk mytologi, i Orfeus og Eurydike og deira dramatiske kjærleikshistorie.
Gode barnebøker kjem ikkje av seg sjølv, seier Hovland. Sjølv var han eit barn som var over snittet glad i å lese, og når han skriv prøver han å herme korleis det var å vere barn.
Seminara i dag held fram med Tor Arve Røssland som snakkar om barnefilm og Bente Bratlund som spør seg om det finst nynorskbøker for barn. Professor Dagrun Skjelbred ved Høgskulen i Vestfold vil snakke om leseboka som litteraturformidlar i eit historisk perspektiv.
Det er no 6. gong Fallturiltufestivalen blir arrangert, og dette er den einaste nynorske barnelitteraturfestivalen i verda.
– Med festivalen har vi eit von om å opne auga til fleire om det som finst av barnelitteratur på nynorsk, sa prosjektleiar Hege Myklebust under opninga av festivalen tidlegare i veka.
