Heim Nyhende Slår eit slag for lettlestboka

Slår eit slag for lettlestboka

– Eg vil yte min skjerv, seier forfattar og redaktør Ragnfrid Trohaug om kvifor ho no har byrja å skrive lettlestbøker.

Trohaug har gjeve ut fleire bøker for unge tidlegare, men har i dag sitt hovudvirke som forlagsredaktør i Det Norske Samlaget.

– Eg er ikkje ein person som går rundt og verkjer når eg ikkje får skrive, hjarta bankar sterkt for redaktørrolla, , seier ho. 

Men ein foreldrepermisjon som kunne utvidast med ein skrivepermisjon, vart for freistande.

– Eg elskar litteratur, og eg er djupt oppteken av barna sine rettar, seier ho og minnest leande at ho i barndommen hadde eit sterkt ønske om å bli barneombod når ho vart stor.

Fann eit miljø

I eit slikt perspektiv vart spørsmålet hennar først og fremst: Kva bøker er det viktig at vi gjev ut fleire av. Og: Korleis kunne ho utfordre seg sjølv i forfattarrolla?

Svaret var lettlestbøker på nynorsk. Bøker for den vesle hovudmålslesaren som treng å bli stø i si eiga målform, som ho seier. Ein type bøker det burde finnast fleire av på nynorsk.

Som tenkt, så gjort. Ein rusletur i gamle trakter i Bergen, nærmare sagt Nordnes, inspirerte forfattaren. Her såg ho fine gatetun, ungar som leikte ute, naboskap som utfalda seg, og ho tenkte «Her hadde det vore fint å dikte inn nokre ungar». Dermed blei det ein utvida permisjon, og den vesle familien hennar flytta frå Oslo til Nordnes for ei stund, og der vart altså historia om tvillingparet Ole og Jenny skapt.  

Etisk dilemma

Ole er ein grei og samvitsfull gut, medan Jenny er meir sprelsk og ulydig. Med dette radarparet får Trohaug spele ut to situasjonar som alltid har fascinert ho: korleis det er å vere tvilling, og korleis det er å lengte etter eit eige dyr.

Sjølv har forfattaren aldri fått ha dyr på grunn av allergi. I boka Vi vil ha hund! prøver søskenparet å skaffe seg eit dyr, og dei endar opp med den noko uheiderlege løysinga å tjuvlåne ein hund som viser seg å vere ein prisløna rasehund

Korleis det går, skal vi ikkje røpe her, men inspirasjonskjelda til løysinga på det etiske dilemmaet røper Trohaug sjølv.

Har fleire historier

– Eg er ein stor fan av Rasmus Løland og er spesielt glad i historia Hunden og katten, seier ho og utdjupar: I Hunden og Katten lèt Løland syndebukken i historia få erkjenne kva han har gjort gale, skrifte og gjere opp for syndene sine utan at dei vaksne er involverte og styrer. Psykologisk er dette veldig fint gjort, meiner ho.

 – Det er viktig for meg at også Ole og Jenny får ta ansvar for det dei gjer. Ansvar går som ein raud tråd gjennom det eg skriv.

No er boka Vi vil ha hund! ein del av Cappelen Damm sin leseløveserie, og Trohaug ser ikkje vekk frå at det kjem fleire. Ho har laga skisser til fleire historier om tvillingane, så viss det er tid og rom innafor redaktørjobben, kjem vi garantert til å få høyre meir om Ole og Jenny også i framtida.

 

Førre artikkelVegen opnar nye dører
Neste artikkelRundar av Falturiltu

NYNORSK INSPIRASJON

Kurstilbod for skular og barnehagar

Arbeidet for å styrkja språkopplæringa i det offentlege er ei prioritert oppgåve for Landssamanslutninga av nynorskkommunar (LNK). Kursa våre blir administrerte og gjennomførte av Fretland...

Språklova: Dette er dei viktige paragrafane for nynorskkommunane

Frå og med 1. januar 2022 er nynorsk og bokmål formelt jamstilte og likeverdige språk på alle samfunnsområde. Formålet med lova er...

Har kommunen din levert høyringssvar om ny opplæringslov?

Arbeidet med ny opplæringslov er svært viktig for nynorskelevane og nynorskkommunane. LNK oppmodar alle medlemskommunane sine om å setja tydelege krav til...

Nytt samarbeid skal styrka nynorsken i barnehagane

Pirion og Sunnfjord kulturskule har laga til ei digital kursrekkje som skal hjelpa til med å styrkja nynorskarbeidet i barnehagane.

Seks fine julebøker på nynorsk

Mange skular og barnehagar bruker adventstida til høgtlesing kvar dag. Her får du tips til fleire gode bøker på nynorsk med god...

Vil gi utviklingsstøtte til fleire nynorske produksjonar i Den kulturelle skulesekken

Kulturtanken, Seanse, Høgskulen i Volda og fleire fylkeskommunar samarbeider om å få meir nynorsk i Den kulturelle skulesekken i ei heilt ny...

MEST LESE

LNK om ny opplæringslov: – Stortinget må sikra meir nynorsk i skulen

Nynorskkommunane (LNK) er glad for at regjeringa vil lovfesta at skulen skal ha skriveprogram som støttar nynorsk, men meiner lova må oppdaterast for å...

Mållaget: – Ny opplæringslov forsterkar den digitale læremiddelkrisa for nynorskelevane

– Situasjonen i nynorskklasseromma er alvorleg. Det sit over 73 000 nynorskelevar ved pultane sine og må bruke digitale læringsressursar på feil språk, seier...
Vidaregåande skule

Føreslår å fastsetja hovudmål på vidaregåande skular

I forslaget til ny opplæringslov føreslår regjeringa fleire større og mindre endringar til språk på skulane. Departementet føreslår blant anna: å vidareføra at kommunen skal...

Frieriet i Todalen – kva skjer med Vangsgutane no?

Vi har intervjua tekstforfattar Kjartan Helleve om dei siste hendingane rundt teikneseriefigurane Vangsgutane, som kom fram i siste utgåva om dei ved juletider. Faste...