Landssamanslutninga av nynorskkommunar (LNK) får i 2015 1,1 million kroner i tilskot for å gi råd til kommunane.

– Pengane skal brukast til å gje råd til kommunane om å ta vare på nynorsk språk i kommunereforma, seier kommunal- og moderniseringsminister Jan Tore Sanner i ei pressemelding.

Ein samla kommunal- og forvaltningskomité på Stortinget var ved handsaminga av kommunereforma opptekne av at nynorsk ikkje må bli skadelidande som følgje av reforma. Komiteen vedtok å føra vidare støtta som LNK tidlegare har fått frå Kulturdepartementet, på Kommunal- og regionaldepartementet sitt budsjett.

Denne veka kom tildelingsbrevet frå departementet med 1,1 million kroner i tilskot til LNK.

LNK skal gje råd til kommunane om korleis nynorsk kan styrkast i kommunar både med og utan nynorsk som målform.

Departementet har laga ei rettleiing med råd og tips til kommunane i reformprosessen. Der står det at det er viktig at kommunane kartlegg kva for følgjer ei samanslåing vil få for mellom anna det nynorske språket.

– Det er kommunane sjølve som avgjer kva målform som skal brukast i kommunen. Eg legg til grunn at kommunane vurderer dette spørsmålet og finn gode løysingar på språkutfordringane når dei gjennomfører dei lokale prosessane, seier statsråden.

LES OGSÅ: Frp sikrar tilskot til LNK