Skjønnheitsansvarleg i Det Nye, Julie Botnen, registerer at målrørsla gjerne skulle sett meir nynorsk i glansa magasin.
I eit intervju med Telemarksavisa fortel Botnen som er frå Bø i Telemark at ho hadde nynorsk som hovudmål gjennom heile barneskulen, sjølv om ho innrømmer at det er blitt litt mindre med åra.
– Mållaga masar jo på at fleire i bransjen vår, i slike «glossy» magasin, skal skrive meir nynorsk og eg føler litt på det. sukkar Botnen, til Telemarksavisa.
Etter mange år i den glansa magsinverda fekk ho drøymejobben som skjønnheitsansvarleg i Det Nye.
– Det blir liksom dette livet eller det rake motsette, seier Botnen, som har ein fjern draum om å overta familiegarden i Hardanger med kattehotell, frukt og moreller, sjølv om ho akkurat har kjøpt leilegheit på Torshov i Oslo. Oppvekståra i Bø, då ho spela fele, jobba i gatekjøkken og kunne snu seg etter rånebilar, har ho framleis friskt i minnet, sjølv om barndomsdraumen heile tida har søkt ein meir bynær kvardag, skriv Telemarksavisa.
