Dei neste åra kan det bli bygd ut opp mot 200 nye små vasskraftverk i fylket, ifølgje professor.
Årsaka er den store kraftutbygginga Noreg har forplikta seg til overfor EU til å auke energiproduksjonen med om lag 15 prosent innan år 2020, fortel NRK.no. Om fem år er nemleg målet at 20 prosent av energiforsyninga til unionen skal kome frå fornybar energi.
For å greie dette må Noreg byggje fleire kraftverk. Og ingen får fleire enn Sogn og Fjordane, der ein femtedel av alle nye vasskraftverk kjem til å bli bygd, ifølgje NRK.no.
– Det som er litt spesielt no er at veldig mange av anlegga er små, det er småkraftverk. Vi kan nærme oss eit par hundre småkraftverk i Sogn og Fjordane, seier professor Erling Holden. Han leier eit forskingsprosjekt om fornybar energi og samfunnsverknader som startar opp ved Høgskulen i Sogn og Fjordane til hausten.
Professoren seier til NRK.no at han trur det kan kome reaksjonar når folk skjønar kor omfattande og intensiv kraftutbygginga kan kome til å bli dei komande åra. – Om vi vil det, om folk vil det, står att å sjå, seier Holden til NRK.no. (©NPK)
