Kommunestyret i Hornindal har sagt ja til å slå seg saman med Volda kommune. Grensekommunen byter dermed fylke frå Sogn og Fjordane til Møre og Romsdal.
Mot Sp sine seks røyster gjekk Høgre, Ap og Venstre torsdag kveld inn for å droppe alternativet å slå seg saman med Stryn og heller velje Volda, skriv NRK.
Ei innbyggjarundersøking viste klart fleirtal for ei storkommune med både Stryn, Hornindal og Volda, men Stryn ville ikkje slå seg saman med Volda. Innbyggjarane i Hornindal var i undersøkinga heilt delte i synet mellom kva for eit samanslåingsalternativ som var best, Stryn eller Volda.
– Sjølv eg som den mest innbarka honndalspatriot ser at brura må gifte seg no før ho blir for gammal. Vi må ta eit val, og vi må vekte for og i mot, sa Eldar Englund frå Sp på talarstolen. Han meinte at Hornindal var best tent med å slå seg saman med Stryn, men måtte gi tapt for fleirtalet.
Kommunestyret i Volda vedtok tidlegare i veka at dei ønskjer å slå seg saman med Hornindal. (©NPK)
