Eit fleirtal i fylkestinget i Sogn og Fjordane sa onsdag ja til at Sogn og Fjordane skal bli ein del av ein stor vestlandsregion saman med Hordaland og Rogaland.
Vedtaket blei gjort med 19 mot 11 stemmer. Det var representantane frå Sp, SV og Miljøpartiet Dei Grøne som røysta mot.
Fleirtalet la på si side vekt på at Stortinget har vedteke at talet på folkevalde regionar skal reduserast vesentleg, og at eit fleirtal av kommunane i Sogn og Fjordane er positive til at fylket blir ein del av Vestlandsregionen.
Sogn og Fjordane stiller likevel ein del klare føresetnader for samanslåinga. Klar oppgåvefordeling og ein administrasjons- og tenestestrukturen som byggjer på desentralisering, spreiing av makt og prinsippet om å ta heile regionen i bruk, er nokre av krava til fylkestingspolitikarane. Det blir også streka under at den nye Vestlandsregionen må ha nynorsk som administrasjonsspråk.
Fylkestinget i Sogn og Fjordane varslar at dei vil opna opp for å invitera Møre og Romsdal inn i forhandlingar om ei ny løysing, dersom Rogaland og Hordaland ikkje går for Vestlandsregionen. (©NPK)
