Kulturministeren ser gjerne meir nynorsk i næringslivet
Alder: 29 (vert 30 den 18. juli)
Yrke: kulturminister
Bruker sommaren til: å lese og ha fri
Kvifor er språk så viktig?
Grunnleggjande sett fordi språk og tanke heng nært saman, og fordi både personlig identitet og gruppeidentitet, gjerne også nasjonal identitet, i stor grad er knytt til språket. Språk og språkmeistring er ofte avgjerande for framgang i skule og utdanning, i arbeid og yrke. Språk gir også tilgang til litteratur og andre kulturuttrykk. Språket er ein berar av kulturarv og kan vera den nøkkelen som opnar døra inn til denne arven. Med andre ord: Språk er noko langt meir enn eit middel for effektiv kommunikasjon. Språk er kultur, og ulike språk er unike uttrykk for ein menneskeleg erfaringsrikdom, for kulturelt og intellektuelt mangfald.
På kva område kunne nynorsken vore meir synleg?
På nesten alle område, men særleg i næringslivet, innanfor reklame- og teknologiutvikling, i avisa og i det heile på alle område som kan vera med å gi eit språk særleg status og prestisje. For nynorsk duger til alt, ikkje berre i dikt og song!
Kva trur du skjer med nynorsken etter stortingsvalet til hausten?
Det kjem heilt an på korleis valet går. Me tek mål av oss å fortsetja arbeidet for norsk språk òg etter valet. Men Høgre har sagt at dei vil fjerne den obligatoriske nynorsken frå skulen. Det vil svekke nynorsken si posisjon ganske kraftig. Ein får med andre ord stemme etter hjartet og hjernen om ein er nynorskmann eller -kvinne.
Kvifor nynorsk?
Av di nynorsk er eit uutsletteleg avtrykk av norsk historie og norsk kultur og ein umisteleg del av det språklege mangfaldet i verda! Ingen andre enn me i Noreg kan ta ansvaret for å halda denne arven i hevd som ein levande del av vår kultur. Nynorsk har langt tradisjon som likeverdig og formelt likestilt med det norske fleirtalsspråket og er i dag eitt av to nasjonale hovudspråk i landet vårt. Tenk for ein rikdom og for ein meirverdi dette dobbelte uttrykksregisteret representerer for norsk kultur- og samfunnsliv! I tillegg har nynorsk sjølvsagt ein særleg verdi for alle oss som har nynorskbakgrunn og som er nynorskbrukarar i større eller mindre grad. Derfor er nynorsk også eit spørsmål om språklege rettar og interesser i samfunnet vårt.
