Rockebandet Transistor påberoper seg å vere verdas einaste trønderrockband som syng på nynorsk.
Namn: Terje Espe
Alder: 60
Yrke: Vokalist og låtskrivar for Transistor
Brukar sommaren til: Det blir litt festivaljobbing no i starten, og så skal vi faktisk ha ferie heile juli før vi tar til med spelejobbane att i august.
Sei litt om forholdet til språket ditt: Eg er tospråkleg. I skuletida skreiv eg nynorsk, så den ballasten har eg med meg frå barneåra. Seinar blei det bokmål, men no er eg tilbake i nynorsken.
Korleis hadde det seg at Transistor byrja skrive låtar på nynorsk, då? Det er mi «skuld». Komponist Erling Solem trengde tekstar til eit heavyrockprosjekt han jobba med, og han bad meg om å skrive. Eg prøvde på engelsk, men det blei ikkje bra. Så sende eg han nokre tekstar på nynorsk – og det vart faktisk låtane til den første plata til Transistor.
Korleis er det å vere nynorskbrukar i ein bransje kor så mykje føregår på engelsk? Det ser ut at det kjem stadig fleire som bruker dialekt eller eit nynorsktilnærma språk i musikken sin. Vi opplever også at kritikarane ser og set pris på den språklege dimensjonen vår og kommenterer at tekst og musik kler kvarandre.
Så de har ikkje planar om å prøve dykk på engelsk? Nei.
