I Vindafjord kommune lærer borna språk via leik. Det er Nynorsksenteret som står bak prosjektet Sprek i Språk.
Borna i Vågen barnehage i Ølensvåg var sist veke dei første som kunne ta i bruk dei ferdige språkkorta med songar, rim og regler. Desse korta er baserte på ulike tema som barnehagane sjølve har samla inn, og er delt inn i ulike fagområde som for eksempel «Nærmiljø og samfunn» eller «Natur, miljø og teknikk», skriv Grannar.
— Det er viktig at born får eit forhold til språk frå dei er små. Dei fleste begynner når dei er to år gamle, men det er heller ingenting i vegen for å begynna tidlegare, seier einingsleiar Anne Grethe Gravdal i Vågen barnehage til lokalavisa Grannar.
Namnet på prosjektet skal visa til at ei god språkutvikling heng nøye saman med ei god motorisk utvikling. Og språktreninga kan like gjerne skje ute som inne.
