Styret i Språkrådet tilrår samrøystes å innføre den nye rettskrivingsnorma for nynorsk.
Framlegg til ny rettskrivingsnorm vart lagt fram av rettskrivingsnemda i april i år, etter ein høyringsrunde i vinter.
– Framlegget har fagleg tyngd og brei politisk legitimitet. Inga rettskrivingsreform i Noreg har vore betre fundert, seier Ottar Grepstad, styreleiar i Språkrådet.
Han viser til at det blant fagfolk og nynorskbrukarar flest er usemje om einskilde tiltak i den nye norma, men seier nynorskbrukarane er nærmare ei viss semje i rettskrivingsspørsmålet enn nokon gong.
– Dei sentrale nynorskinstitusjonane som har uttalt seg, støttar hovudtrekka i framlegget, ingen av dei har gått prinsipielt imot. Med samrøystes vedtak i både rettskrivingsnemnd, fagråd og styre får kulturministeren no eit eintydig råd, seier Grepstad i ei pressemelding.
