Bør nettsidene til VisitRauland vere på nynorsk? Debatten går no friskt på nettstaden.
– Det er ei stor skam at Rauland Turist nyttar så å seie berre riksmål på nett og i andre publikasjonar, skriv Vidar Ystad på nettstaden til VisitRauland.
Han legg også vekt på at Vinje kommune har nynorsk som administrasjonsspråk og stiller spørsmål om kva kommunen som storauksjonær i Rauland Turist meiner om språkvalet.
Stein Birger Johnsen er styremdlem i Rauland Turist AS og meiner noko av grunnen til at nettsidene vert redigerte på bokmål er mangel på kompetanse.
– Det viser seg å vere særs vanskeleg å rekruttere medarbeidarar og andre ressurspersonar til arbeid innan reiselivsnæringa i Rauland og Vinje. Me må bruke mykje tid og krefter til omsetjing dersom kommunikasjonen skal vere nynorsk, skriv han i eit debattinnlegg på nettsidene.
Han viser også til at dei fleste som gjestar nettsidene er frå utlandet eller bokmålsdominerte område og at ein difor nyttar bokmål for å nå desse gruppene. Johnsen lovar likevel at det iallefall ikkje skal bli mindre nynorsk på nettstaden.
