Tre studentar på universitetet i Oslo ville kome dei negative haldningane til nynorsken til livs, og har no starta Blindern Nynorske Skipnad.
Det nystarta laget har 25 medlemer, men initiativtakarane Marte Bergo Hildal (20), Linda Hjelle (19) og Anne-Sofie Frøland (20) ønskjer seg mange fleire.
Marte Bergo Hildal frå Stord seier til Framtida.no at dei har sett seg leie av professorar som hånar nynorsken og at dei ikkje blir svara på nynorsk når dei vender seg til skuleadministrasjonen, slik mållova krev. Anne-Sofie Frøland fortel at ho måtte mase seg til å få eksamen på nynorsk, trass i at ho er registrert som student med nynorsk som hovudmål. Og prøva ho fekk var på ei blanding av nynorsk og ny-dansk, seier ho.
No håper dei at den nye skipnaden skal kunne endre på desse tinga.
– Formålet vårt i Blindern Nynorske Skipnad er hovudsakleg å skape merksemd rundt språket, og endra mange austlendingar si negative oppfatning, fortel Marte Bergo Hildal.
