I Språkåret 2013 skal Noregs Mållag reise land og strand med sin eigen nynorskstafett.
Stafetten startar i Ørsta 28. januar og avsluttar i Bygland 19. oktober etter å ha vore innom minst 140 stader.
For Mållaget er det viktig at nynorskbrukarar kan bruka språket sitt over alt.
– I Språkåret vil vi på ulike måtar visa fram kor mykje nynorsken rommar og kor viktig han er for dei mange som bruker han ofte eller dagleg. Vi ynskjer at fleire skal skriva meir nynorsk, og vi ynskjer eit språkleg raust samfunn der flest mogleg ser gleda i og verdien av å meistra både nynorsk og bokmål, skriv dei i ei pressemelding.
– Dei to skriftspråka og dei mange dialektane gjer språkmangfaldet stort innanfor det norske språket. Mangfaldet er ein ressurs som mellom anna gjer oss gode til å forstå svensk og dansk. Dess meir språk vi lærer, dess lettare lærer vi også endå fleire språk. At vi har både nynorsk og bokmål, er difor ein fordel for oss i språklæringa.
