– Regjeringa har ein veldig offensiv språkpolitikk i bokstavar, men eg saknar ein like offensiv språkpolitikk i kroner, seier Håvard B. Øvregård, leiar i Noregs Mållag
Øvregård er godt nøgd med det auka tilskotet til Noregs Mållag på ein halv million, og trur at auken i dei økonomiske rammene for biblioteka, Kulturrådet og lærebøker vil gagne nynorskbruken. Han ser òg fram mot etableringa av eit nytt kunnskapssenter for utdanning frå 2011.
– Dette er noko me har etterlyst i fleire år, og er glade for at dette no har kome på plass. Det er svært viktig at me får meir forsking og fleire fakta på bordet kring spørsmål om målbyte og om sidemål, seier han i ei pressemelding.
Likevel etterlyser han konkrete løft.
– Kyrkje- og kulturdepartementet skal ha ros for at dei har sett språkpolitikk på dagsorden slik dei gjorde med Språkmeldinga. Det gav oss trua på at det no ville kome ei skikkeleg satsing. Det kan eg ikkje sjå i dette budsjettframlegget.
Blant anna meiner Øvregård det er sett av for lite midlar til å etablere Språkbanken. Det er sett av 5,5 millionar til dette føremålet i budsjettet, medan Håvard B. Øvregård meiner ein treng omlag 100 milionar for å fullføre jobben.
Les meir her.
