Folkerøystinga om skulemål ved den nye skulen i Nord-Aurdal i Valdres enda med 340 stemmer for bokmål og 196 for nynorsk.
Det er tre skular i Valdres-kommunen som no skal bli til éin, og desse er per i dag to bokmålsskular og ein nynorskskule. Den nye skulen får 430 elevar. Nord-Aurdal kommune er ein språknøytral kommune. Ifølgje NRK er meiningane om saken svært delte, med foreldra som ønskjer bokmål medan resten av folket ønskjer nynorsk.
546 av dei omlag 5000 med stemmerett møtte opp for å seie meininga si.
– Det er skuffande at ikkje fleire deltok i avstemminga. Men no har politikarane fått eit råd frå folket, og eg ser ingen grunn til at vi ikkje skal ta rådet til følgje, seier ordførar Inger Torun Klosbøle (Ap) til avisa Valdres.
Kommunestyret skal ta den endelege avgjerda på kommunestyremøtet torsdag 31. mai.
