Ordførarane i dei fire kommunane Førde, Jølster, Gaular og Naustdal har bestemt seg for å gå vidare med Sunnfjord som namn på den komande storkommunen.
– Det er dette som er fastsett i intensjonsavtalen og vedtatt i alle kommunestyra. Det er naturleg at vi tek tak i det, og avklarer dei spørsmåla som er reiste rundt namnet, seier Førde-ordførar Olve Grotle til avisa Firda.
Utfordringa er at omgrepet Sunnfjord dekkjer fleire kommunar enn dei fire som skal slå seg saman, og namnet kan derfor bli vanskeleg å få godkjent. Ordførarane skal derfor no sjekke korleis naboane stiller seg til at dei ønskjer å bruke Sunnfjord som namn på den nye kommunen.
Jølster-ordførar Oddmund Klakegg har tidlegare avvist namneforslaga Førde og Jølster. Han har samtidig peika på at Indre Sunnfjord kommune vil vere eit godt brukande namn, skriv avisa.
